ភ្នំពេញ៖ រាជរដ្ឋាភិបាលកម្ពុជាបានសម្រេចដកនូវលក្ខខណ្ឌដែលឲ្យអ្នកដំណើរមកពីបរទេសតាមច្រកផ្លូវគោក ផ្លូវទឹក និងផ្លូវអាកាស ត្រូវបង្ហាញបណ្ណ ឬវិញ្ញាបនបត្រចាក់វ៉ាក់សាំងកូវីដ-១៩ ពេលមកដល់កម្ពុជា។
តាមសេចក្តីប្រកាសព័ត៌មានរបស់ក្រសួងសុខាភិបាលនាថ្ងៃទី០៣ ខែតុលា ក្រសួងសុខាភិបាលទទួលបានការឯកភាពឲ្យដកចេញនូវវិធានការនេះពីនាយករដ្ឋមន្ត្រី សម្តេចតេជោ ហ៊ុន សែន។
តែយ៉ាងណារាជរដ្ឋាភិបាលបានបញ្ជាឲ្យបន្តរក្សាទុកនូវម៉ាស៊ីនវាស់កម្តៅពីចម្ងាយ នៅតាមច្រកទ្វារចេញចូល។ ជាមួយគ្នានេះ ត្រូវចាត់ចែងឲ្យមានមន្ត្រីទទួលបន្ទុកការងារចត្តាឡីស័កមួយចំនួននៅតាមច្រកទ្វារព្រំដែន ដើម្បីត្រួតពិនិត្យ និងផ្តល់ជាយោបល់ចំពោះអ្នកដំណើរដែលមានរោគសញ្ញា ឬអ្នកជំងឺផ្សេងៗ។
ទោះបីនាយករដ្ឋមន្ត្រីកម្ពុជាបានដកនូវលក្ខខណ្ឌនេះក្តី ប៉ុន្តែក្រសួងសុខាភិបាលបានអំពាវនាវដល់ពលរដ្ឋដែលពុំទាន់ចាក់វ៉ាក់សាំងកូវីដ-១៩ ដូសមូលដ្ឋាន ឬដូសជំរុញ រួសរាន់ទៅចាក់វ៉ាក់សាំងឲ្យបានគ្រប់ៗគ្នា។ ទន្ទឹមនេះក្រសួងសុខាភិបាលបានអំពាវនាវដល់ពលរដ្ឋប្រុងប្រយ័ត្ន និងបន្តអនុវត្តនូវវិធានការ៣ការពារ ៣កុំ និងតាមដានសុខភាពខ្លួនឯងដើម្បីចៀសវាងការឆ្លងជំងឺរាតត្បាតសកលនេះ ខណៈជំងឺប្រភេទនេះនៅកម្ពុជា និងពិភពលោកកំពុងតែបន្តរាតត្បាតនៅឡើយ៕